Árið 2024 var ánægjulegt og gleðiríkt fyrir Bandalag kvenna í Reykjavík. Stjórnin fundaði með reglubundnum hætti ásamt því að haldnir voru tveir formannaráðsfundir á árinu. Húsfundir með öðrum eigendum Hallveigarstaða voru einnig á sínum stað.

Ársþingið var haldið í kvennaheimilinu Hallveigarstöðum sem við erum mjög stoltar af. Þingið var vel sótt. Þóranna Þórarinsdóttir ritari BKR hélt fyrirlestur um jákvæða sálfræði og ung söngkona Emma Dís Tómasdóttir kom og söng fyrir okkur. Ásdís húsmóðir Hallveigarstaða töfraði svo fram veitingarnar eins og henni einni er lagið.

Árið 2024 var Ásdís valin kona ársins hjá BKR fyrir störf í þágu kvenfélaganna og Marta María skólameistari Hússtjórnarskólans fékk hvatningarverðlaun BKR fyrir störf í þágu skólans.

Á árinu var tekið viðtal við formann BKR í Morgunblaðinu. Einnig lánaði BKR leikmuni í þáttunum um Frú Vigdísi.

Afmælis fundurinn okkar var á sínum stað með veitingum frá Ásdísi. Vilborg Þ.K.Bergman formaður fór yfir sögu BKR og Rannveig Jóhannsdóttir kom og sagði okkur frá því hvernig var að vera kvenstjórnandi á Indlandi.

Fulltrúar úr stjórn BKR þáðu boð Færeysku sendiskrifstofunnar á Kjarvalsstaði í tilefni Fánadags Færeyinga. Bandalag kvenna í Reykjavík tók þátt í minningarathöfn um Ólafíu Jóhannsdóttur þar sem Vilborg formaður hélt m.a. tölu um Ólafíu.

17. júní var svo opið hús í Hússtjórnarskólanum þar sem fulltrúar BKR aðstoðuðu á viðburðinum. Formanni BKR ásamt stjórnarkonum Hússtjórnarskólans var boðið á ýmsa viðburði skólans. En við í BKR erum mjög stoltar af því starfi sem unnið er í skólanum og frábærum skólameistara skólans.

Við hjá BKR tókum svo þátt í viðburði á Kynjaþingi ásamt Kvenréttindafélaginu og Kvenfélagasambandi Íslands. Bandalag kvenna í Reykjavík var aðili að kvennafrídeginum 2024 líkt og árið 2023 og er einnig aðili að Kvennaárinu 2025. Formaður BKR er í stjórn og framkvæmdastjórn fyrir hönd BKR. Við hjá BKR hvetjum öll okkar aðildarfélög til að tileinka árið konum og halda viðburði tengda Kvennaárinu 2025.

Í nóvember var svo fræðslufundur haldinn í formi Pub quiz og voru spurningarnar úr sögu kvennabaráttunnar.

Jólafundurinn okkar var svo í desember með hefðbundnu sniði. Ásdís sá um veitingar, Dagbjört Teodórsdóttir flutti hugvekju, Þóranna Þórarinsdóttir las jólasögu og Birta Birgisdóttir sögn nokkur lög. Happdrætti starfsmenntunarsjóðs ungra kvenna var á sínum stað. Mörg flott fyrirtæki sáu sér fært að styrkja okkur að þessu sinni og kunnum við þeim kærar þakkir fyrir. Í ár úthlutuðum við styrkjum í Starfsmenntunarsjóði ungra kvenna líkt og við höfum gert undanfarin ár.

Við í stjórn BKR horfum stoltar til starfa okkar á árinu 2024 og hlökkum til þess sem framundan er á árinu 2025. En þess má geta að stjórnarstarfið er allt unnið í sjálfboðavinnu.

Kær kveðja

Vilborg Þ.K.Bergman formaður BKR

Ásdís sér um kaffið. Hugvekja og söngur. Fjáröflunar happdrætti Starfsmenntunarsjóðs verður á sínum stað. Hlökkum til að sjá ykkur. Kveðja stjórnin.

Laugardaginn 5.mars sl. hélt Bandalagið sitt 106. ársþing á Nauthól. Ánægjulegt var að geta haldið viðburð án takmarkana eftir tveggja ára covid og bar þingið þess sannarlega merki. Glaðbeittar konur héldu uppi líflegum umræðum og hefðbundin dagskrá fór vel fram. Bandalagið tilnefndi Sigurþóru Bergsdóttir frá Berginu sem KONU ÁRSINS 2021 og Hvatningarviðurkenningu ársins 2021 hlaut BAKVARÐASVEIT covid 19 og var það Ragnheiður Ósk Erlendsdóttir hjúkrunarfræðingur sem veitti verðlaununum móttöku. Í lokin var það Ólafur Jón Jónsson sem fræddi þingið um hættur á netinu. Við þökkum öllum þeim sem mættu fyrir samveruna og góðar stundir. Fanney Úlfljótsdóttir formaður kvaddi Bandalagið eftir 5 ára formennsku og við keflinu tók Vilborg Þ.K. Bergman. Fleiri myndir eru á Facebook síðu BKR.

Bandalag kvenna í Reykjavík óskar félagsmönnum sínum gleðilegs árs og þakkar fyrir samstarfið á liðnu ári.

Stjórn BKR hefur ákveðið að aflýsa jólafundi og boða þess í stað til nýársgleði 19. jan. 2022 með happdrætti til styrktar Starfsmenntunarsjóði ungra kvenna. Fjáröflunarnefndin ásamt formanni er búin að safna glæsilegum vinningum sem  dregnir verða út á nýársgleðinni. Væntanlega verðum við öll komin með örvunarskammtinn á þessum tíma svo við ættum að geta átt glaðan dag saman. Ný auglýsing um nýársgleðina verður birt fjótlega í janúar

25. ágúst sl. voru greiddir út 10 styrkir úr Starfsmenntunarsjóði ungra kvenna, samtals að fjárhæð kr. 1.485.000. Sjóðurinn hefur styrkt konur til náms undanfarin 25 ár.

Alma Möller landlæknir valin kona ársins og Eliza Reid fékk hvatningarviðurkenningu BKR á 105. ársþingi BKR 26. maí 2021.

Ölmu Möller landlækni þarf ekki að kynna en henni má segja var kastað í djúpu laugina í byrjun mars í fyrra þegar Covid19 skall á með fullum þunga.

Dag eftir dag birtist hún á skjánum sem hluti þríeykisins og hvatti okkur áfram. Þvo hendur, spritta, ekki fálma í andlitið, svo mætti lengi telja. Með fallegri og látlausri framkomu, samt ákveðin,  vann hún sér inn virðingu þjóðarinnar.

Alma er fyrsta konan sem gegnir stöðu landlæknis og brýtur þannig blað í sögu  embættisins. Hún tók við því starfi 1. apríl 2018. Áður átti hún langan feril sem læknir og er sérsvið hennar svæfingar og gjörgæsla.

Eliza Reid forsetafrú. Fyrirmynd kvenna á íslandi.

Fyrir hönd allra kvenna á Íslandi hlýtur Eliza Reid forsetafrú hvatningarviðurkenningu Bandalags kvenna í Reykjavík fyrir árið 2020. Konur landsins hafa sýnt mikla samstöðu og verið hver annarri hvatning í baráttunni við Covid-19 og þar er Eliza Reid forsetafrú í fararbroddi. Hún er því verðugur viðtakandi viðurkenningar fyrir hönd allra kvenna á Íslandi árið 2020.

105. ársþing BKR var haldið 26. maí á Nauthól. Þingið var vel sótt af fulltrúm félaga i bandalaginu. Aðalefni þingsins voru lagabreytingar og voru þær samþykktar. Nýr ritari var kosinn í stjórn BKR, Hafdís Karlsdóttir, Kvenfélagi Seljasóknar og fráfarandi ritara, Þorbjörgu Jóhannsdóttur, Fjallkonum, voru þökkuð vel unnin störf. Dögg Hjaltalín, Félagi háskólavenna, var kosin í stjórn Hússtjórnarskólans í Reykjavík.

Í lok apríl lauk þriggja ára formennsku BKR í stjórn Hallveigarstaða. Formaður BKR, Fanney Úlfljótsdóttir, lét af störfum sem framkvæmdastýra og Ingveldur Ingólfsdóttir lét af störfum sem formaður stjórnar Hallveigarstaða. Ingveldur situr áfram í stjórn í eitt ár. Við formennsku næstu þrjú árin verður Kvenfélagasamband Íslands.

Á myndinni tekur Fanney við kveðjugjöf úr hendi Ingveldar, fráfarandi formanns,

Bandalag kvenna í Reykjavík rekur Kvennaheimilið Hallveigarstaðir í samstarfi við önnur samtök kvenna. Húsið var vígt 19. júní 1967 og 26. apríl var Kvennasögusafni Íslands afhent gögn úr sögu hússins til varðveislu.Á mynd frá vinstri: Rakel Adolphsdóttir forstöðumaður Kvennasögusafn Íslands Tatjana Latinovic formaður Kvenréttindafélags Íslands, Fanney Úlfljótsdóttir formaður Bandalag kvenna í Reykjavík, BKR, Dagmar Sigurðardóttir ritari húsnefndar, Ingveldur Ingólfsdóttir formaður húsnefndar, Guðrún Þórðardóttir formaður Kvenfélagasamband Íslands

Bandalag kvenna í Reykjavík óskar landsmönnum öllum gleðilegs sumars og vonar að sumarið verði ánægjulegt.

Í lögum BKR segir svo í 5. gr.

5. grein: Ársþing

a) Ársþingið fer með æðsta ákvörðunarvald BKR. Það skal haldið fyrir lok mars ár hvert. Ársþing skal boða bréflega með mánaðar fyrirvara ásamt dagskrá.

Þar sem núgildandi sóttvarnir gilda til 17. febrúar nk. er rétt að boða til ársþings skv. lögum BKR fyrir lok mars, þ.e. laugardaginn 27. mars. Ef ekki verður hægt að halda ársþingið þennan dag vegna fjöldatakmarkana, verður beiðni send út tímanlega um frestun, alla vega fram í maí. Dagskrá þingsins er hefðbundin og verður send út tímanlega fyrir þingið.